बालिका बलात्कार गरी भागेका बम्जन पक्राउ

सिन्धुली । सिन्धुलीको दुधौली नगरपालिका–२ निवासी  १४ बर्षिया बालिका समिक्षा (काल्पनिक नाम) लाई बलात्कार गरी फरार रहेका सोही ठाँउ निवासी ४२ बर्षिय हेमबहादुर बम्जनलाई प्रहरीले पक्राउ गरेको छ । 
पक्राउ परेका अभियुक्त बम्जनलाई घर आउदै गरेको अवस्थामा सोमबार साझ ७ बजे बेलुका पक्राउ गरिएको जिल्ला प्रहरी कार्यालयले जनाएको छ । कार्यालयका अनुसार पक्राउ परेका अभियुक्त बम्जले ती बालिकालाई २०७७ साल भदौ १२ गते जङगलमा बाख्रा चराउन गएको समयमा कोही नभएको मौका छोपी जबरजस्ती करणी गरी भागेको खुल्न आएको छ ।
प्रहरी नायब उपरिक्षक श्यामबहादुर खत्रीका अनुसार पक्राउ परेका बम्जनले आफु फरार रहेको अवस्थामै गत मङसिर ३ गते पीडित बालिकालाई नियन्त्रणमा लिई गएको भन्ने बालिकाको दाजुले दिएको उजुरीको आधारमा खोज तलास गर्दा बम्जन आफ्नो घर तर्फ आउने क्रममा बाटोमा प्रहरीले फेला पारी पक्राउ गरेको हो । 
पीडित बालिकालाई बारा जिल्ला निजगढ नगरपालिका वडा नं. ११ रतनपुरस्थित बम्जनको आफन्तको घरबाट प्रहरीले बुधबार बिहान उद्धार गरी ल्याएको उहाँले जानकारी दिनुभयो । पक्राउ परेका बम्जनलाई मङगलबार जिल्ला अदालतमा पेस गरी छ दिनको म्याद थप गरेर अनुसन्धान सुरु गरिएको उहाँले बताउनुभयो ।